HET GEHEIM VAN 'T ZAAND BIE DIEVER Heel lang eleden lag nen boer van een
veurname familie in Diever op starven. Noe is dat gin biezunder veurval, want ok
rieke leu gaot der een keer an. Zee regelt heur zaakjes good, want riekdom nem
ie nich met. Nee, as nen riek man op zien starfberre ligt te dreeien en onrustig
te wezen, dan is d'r wat aans loos. Het kan nen slimme pien wezen. Mar in dit
geval was het een geweten dat last gaf. In nen halfduustere kamer in nen grote
boerderiej, zo'n ollen met reeten dak en völle gebinten, lag Lammert Berend van
de familie B. op nen berre, dat in de heugte zet was. Hee was zo wied hen, dat
he nich meer overend kommen kon. Nen strabaante tante oet de familie was bie de
hand om hum te verzörgen. Hee gung al meer achteroet en de dokter har zegd dat
het eerder um dagen dan um wekken gung. Toch was de patient nog nooit zo
ongedoerig ewest as vandage. He dreeiden um en um, he kreunden en hee leek wal
koortsig hardop te dreumen. Lammert B. har het slim benauwd. Net toen hee wat kalmer wodden en de
tante even vot gaon wol, klunk het vanoet berre met luide stem: "Roop mie
mien zeuns. Ik wil ze sprekken. Direct!". Met zien leste krachten bleef de
boer commanderen en tante gung rap vot um de bosschup deur te geven. Alle zeuns
kregen te heuren 'dat ze bie heur va kommen mussen'. D'r was haost bie. De
kerels leuten heur wark liggen en trokken naor de zeekenkamer in de olle
boerderieje. De zeuns B. stunnen bie het berre van
heur va, den het aldernaost benauwd har. Zien aosem jagde piepend in en oet,
zien heufd was opezet en leup dik rood an. "Wat wo'j zeggen, va?",
vreug nen oldsten zeun, "Doot mar heinig an". Het bleef even stil,
toen zee de olle man: "Ik was het, vieftig joar terugge. Ik heb 't edoan"."
Waor hej 't over?", vreug der ene mar de zeeke boer lusterde nich en gung
vedan: "Met 'n aks. He blooden arg en gung rap dood". Het wodden ieskold en doodstil um 't
berre. De zeuns kenden de geruchten, de praoterij over nen duustere verdwiening
vrogger van nen andere rieke boer -den wal dood wezen kon. Zien liek was nooit
vunnen. Later kwam oet dat de familie B. völle groond in bezit kregen har, dat
nooit in de verkoop kommen was. De geruchten dat dizzen boerenfamilie wat met de
verdwiening te maken hebben kon, wodden starker - maar der was ginnen spoor van
bewies. Dat scheut alle zeuns deur de kop. Dus toch? Lammert B. gung deur: "Ik heb hum
papieren teken laoten en toen den kloot de hassens inhouwen. Gerhard en ik hebt
hum na donkerwodden votbracht op de kipkarre, het veld in".En hee neumde de
stee waor ze hem onder het zaand stopt hadden. Gerhard was nen olle knecht, den
al lange dood was. De boer zee weer wat, zachter praotend:
"Zeukt hem, jongs. Laot hum opgraven en zorg veur nen christeliken
begrafenis". En, met meuite inenen met luude stem: "Mar laot gineene
weten dat ene van dizzen familie hum doodhouwen hef. Hold het geheim bie oe.
Aajt en eeuwig. Beloof mie dat!" en zien ogen lichten op, toen hee ze een
veur een strak ankeek. Hee was aajt nen dictatorialen heerser ewest, in de
familie en in het dorp. De jongkerels nikkopten. Het zol geheim blieven en ze
zollen zienen leste wens vervullen. Deur dizzen moordbekentenis kleefden d'r een
vleuk an de familie B., den bleef zolang den vermoorde boer nich evunden en weer
ter aarde besteld was. Lange tied nao de begrafenis van Lammert
Berend B. wodden der nich meer over epraot. Tot de oldste vun, dat der wat
gebeuren mus. Mar ja, hoe hol-ie zukswat geheim aj nen verdwenen old liek wilt
laoten opgraven? Ze wussen ongeveer de stee waor as-he liggen mus. Het doerden
lange veur de familie B. veur dat probleem nen oplossing vun. Der gun nen
generatie overhen. De kleinzeuns kregen van heur va dezölfde opdracht met. Enen
zat in de makelaardij, 'n aander deu wat in de advocaterij en nen daarde was nen
politicus 'met perspectief'. De vleuk van de familie rustte ok op heur - wat
rampzalig wezen kon as zukswat oetkwam. Heur oplossing was simpel: laot aandere
leu graven naor nen schat en het geraamte van de vermoorde kump vanzölf nen
keer opduken. As dan oetkump wel 't is, krig-he zienen ordentelijke begrafenis.
Klaor. De naozaten van de familie B. strooiden wat klein geld oet op de bewuste
plekken boeten en zörgden veur het lopend gerucht daj wat waardevols vinden kon
op 't Dieverveld.. Mangs deuden ze d'r nen golden tientje bie:'Wilhelmina met de
lange haoren' -oet het familiebezit. Het hölp gin mieter. Het geraamte bleef
vot. Daorum hef de familie B. kort-eleden heur acties opvoerd. Mangs kuj nen dikke auto zien op de
parkeerplaatsen bie de 'Hoekenbrink' en de 'Witte Bergen' an de weg van Diever
naor Wateren. Nen heer in maotpak löp snel een rondje deur 't zand en strooit
kwanswies nen bulte muntgeld in het zaand. Mangs ok weer zonnen golden tientje. Daormet weet-ie geliek waorum beide
plekken lös stoefzand bleven bint. Het is de graveriej naor munststukken den
dat döt. Het geet deur zolang de vleuk op de familie H. rust. Beide
natuurreservaatjes hebt zo nog nen rieke toekomst… Harmjan
van Steenwijk
Copyright 1995 - 2008 Han Tuttel. All rights reserved.
|