't Is al weer even terugge, mar het beeld
steet mie nog scharp veur ogen. Het geluud za'k nooit vergeten. Achterof
bekeken zol dat kleine veurval op 10 meert 2002 d'r met te maken kunnen
hebben. Wel zal 't zeggen. Op dizzen zundag was der vanoet het
bezoekerscentrum Terwisscha van 't nationaal park Drents-Friese Wold nen
publieksexcursie naar de Kale Duinen. 'Lammetjes kieken in de woestijn',
zee 't persbericht. D'r kwam zo'n honderd man volk op of. Het gung
allemaol prachtig en ze hadden der mooi weer bie. Mar wat gebeurden d'r
naotied? De leu van Staatsbosbeheer in het bezoekerscentrum kregen ineens
nen wichtje aan de balie met een lammetje op de arm. "Heb ik
gevonden, hij lag alleen en hij riep zo zielig", zee ze. Noh, ze hebt
de schaopenboer d'r biehaald en den hef lang wark had um de ooi van dat
lam op te sporen, argens op de hei. Het kwam allemaol wal terecht, mar
toch. Dat lam was nen apatten, het trok andacht. Hee wol wat van de
mensen. Veurige wekke leupen wie vanoet Wateren
ok deur bos en hei in 't Drents-Friese Wold en gungen argens op nen bultje
zitten, koffie drinken oet de thermosfles en krentenstoet smikkelen. Wie
hadden zicht op het nije open stuk, met de oetkiektoren an 't ende. Laot
noe inenen nen groot lam met de veurpoten neust de koffiekan kommen te
staon! Hee keek ons recht in
de ogen en he begunde onmeunig verdreetig te mekkeren. Hee kwam nog
dichterbie en het was of he wat zeggen wol. Dat gemekker was praoten,
mangs zachies en dan harder, asof wie doof waren. Ie könt wal zeggen dat
wie nen communicatieprobleem hadden, want de bosschup kwam nich over. Asof
het lam van nen aandere planeet was, óf dat wie dat waren vanzölf. Zien
gemekker wodden gejammer dat deur marg en been trök. De blik in zien ogen
wodden duuster en toen op slag glashelder - je keek d'r dwars deur. En wie
ontdekten, wat he zeggen wol! Toen het beest deur had, dat wie het
begrepen hadden, gung het vot. Wie zaten stomverbaasd, met nen bek vol
krentenstoet en ogen zo groot as pankookenteller. Wie ontdekten nen hele historie - het lam
was gin normaal lammetje èn 't was nen 'zij'. Het arme schaop bleek nen
betoverd wichtje oet vrogger tieden, dat um verlossing smeekten. Daorum
dee toonadering, daorum dat eigenaardige gemekker en daorum dat opdringere
gedoo. Het arrme schaop wol terug naor de mensenwereld. Veurzover wie het
begrepen hebt, geet het um een mooi, schier wichtje dat ooit bie nen klein
keuterie heurde in de begintied van Wateren, honderden jaoren heer. Toen
ha'j nog Groot- en Klein Wateren en d'r umtoe was alles
hei, veenties en zaandstoeverij op het Dieverderveld, het Watersche
Veld en 't Aekingerzaand. Op nen kwaoie dag mus het meidje een of aander
karweitje doon, wiederop het veld in. Het zol kunnen dat ze wat zag, nen
vogel of nen beest. Wel zal 't zeggen, maar ze raakten het spoor volsagen
biester en toen het weer omsleug, zochten ze van ellende beschutting
achter nen bult op de hei. Ze kwam weer bie 't benul toen nen voddige
kerel, met nen dikke vlasbaord, heur oppakte en hogerop trok. Hee gromden
wat en begunde zien boks lös te maken. Zee gilden 't oet van angst en
trapten den vrömde vent daor, waor hee het nich lieden kon. Hee gaf heur
nen bats veur de kop, zodat ze boeten westen raakten. Toen ze biekwam, lag
ze vastbunden op nen vettige strozak in een of aander donker krot, of hol.
Wel zel 't zeggen. Harmjan
van Steenwijk
Copyright 1995 - 2008 Han Tuttel. All rights reserved.
|